අවු. 16ට අඩු දරුවන්ට සමාජ මාධ්‍ය තහනම්?

2026 ජූලි 08, ප.ව. 1:55

ශ්‍රී ලංකා පාර්ලිමේන්තුව අමතමින් අගමැතිනි හරිනි අමරසූරිය මහතා අද (08) පැවසුවේ වයස අවුරුදු 16 ට අඩු ළමුන් අතර සමාජ මාධ්‍ය භාවිතය තහනම් කිරීම හෝ සීමා කිරීම සඳහා වන යෝජනා ගවේෂණය කිරීම සඳහා කාන්තා හා ළමා කටයුතු අමාත්‍යාංශය පාර්ශ්වකරුවන් සමඟ මූලික සාකච්ඡා ආරම්භ කර ඇති බවයි.

සමාජ මාධ්‍ය, ඩිජිටල් ආරක්ෂාව සහ ගෝලීය සංවර්ධනයන්හි සමාජීය, මානසික සහ සෞඛ්‍යමය බලපෑම් කෙරෙහි මෙම උපදේශන අවධානය යොමු කරන බවත් අගමැතිනි අමරසූරිය මහත්මිය පැවසුවාය.

එමෙන්ම දරුවන්ගේ මානසික හා ශාරීරික යහපැවැත්ම ආරක්ෂා කිරීම අරමුණු කරගත් දැනුවත් කිරීමේ ව්‍යාපාර සමඟින්, 16 ට අඩු ළමුන් සඳහා ප්‍රවේශය තහනම් කිරීම පිළිබඳ ජාතික මාර්ගෝපදේශ කෙටුම්පත් කිරීමේ කටයුතු සිදුවෙමින් පවතින බව ඇය සඳහන් කළාය. වයස අවුරුදු 18 ට අඩු දරුවන්ට ජංගම දුරකථන ඇබ්බැහි වීමෙන් මිදීමට උපකාර කිරීම සඳහා කාන්තා හා ළමා කටයුතු අමාත්‍යාංශය වැඩසටහනක් ද දියත් කර ඇති බවත්, එය දැනටමත් ධනාත්මක ප්‍රතිඵල පෙන්වා ඇති බවත් අග්‍රාමාත්‍යවරිය ප්‍රකාශ කළාය.

ඇය පවසා සිටියේ,

“වයස අවුරුදු 16ට අඩු දරුවන්ගේ සමාජ මාධ්‍ය භාවිතය අවම කිරීම සඳහා ජාතික මාර්ගෝපදේශ සංග්‍රහයක් සකස් කිරීම, දරුවන්ගේ මානසික සෞඛ්‍ය ප්‍රවර්ධනය කිරීමේ අරමුණින් Brain Health යන සංකල්පය පදනම් කරගනිමින් ජාතික මට්ටමේ දැනුවත් කිරීමේ කතිකාවතක් ආරම්භ කරලා තියෙනවා. ඒ අනුව දැනට කාන්තා හා ළමා කටයුතු අමාත්‍යාංශය මඟින් පවුල් සවිබල ගැන්වීමේ වැඩසටහනක් ක්‍රියාත්මක කිරීම සඳහා නියමු වැඩසටහනක් ආරම්භ කර තියෙනවා.

එමඟින් අවුරුදු 18ට අඩු දරුවන් සිටින පවුල්වල ජංගම දුරකථනවලට ඇබ්බැහි වූ දරුවන් ඉන් මුදවා ගැනීමට ක්‍රමවේද හඳුන්වා දී ක්‍රියාත්මක කරන අතර නියමු ව්‍යාපෘතිවල සාර්ථක ප්‍රතිඑල ලැබී ඇති බව වාර්තා වෙලා තියෙනවා. මේක රජයේ ප්‍රමුඛතාවයක් හැටියටත් අපි මැදිහත්වෙන කාරණයක්. ඒක, එක ක්‍රියාවකින් අපිට පාලනය කරන්න හෝ නියාමනය කරන්න පුළුවන් දෙයක් නෙවෙයි. සමාජ මාධ්‍ය තහනම් කිරීම පිළිබඳව විතරක් නෙවෙයි. අපි ක්‍රියාමාර්ග ගණනාවක් ගැන කතා කරමින් ඉන්නවා. අධ්‍යාපනය තුළත් වෙනත් අවස්ථාවලත් සමාජ මාධ්‍ය භාවිතාව Digital Health කියන එක ගැන උපදෙස් ලබා ගනිමින් අපේ රටට සුදුසුම ක්‍රියාමාර්ග මොනවාද කියන එක ගැන අපි සාකච්ඡා කරමින් මේ අවුරුද්ද තුළ කැබිනට් එකට ඉදිරිපත් කරන්න අපි සැලසුම් කරලා තියෙන්නේ”