උණට බෙහෙත් ගන්න ගිය දියණියට අතක් අහිමි වෙයි

2023 සැප්‍තැම්‍බර් 04, පෙ.ව. 11:27

උණ රෝගය හේතුවෙන් යාපනය ශීක්ෂණ රෝහලට ඇතුළත් කළ අට හැවිරිදි දැරියකගේ අතක් ශල්‍ය කර්මයක් මගින් යාපනය ශීක්ෂණ රෝහලේ වෛද්‍යවරුන් විසින් අද (04) කපා ඉවත් කොට තිබෙනවා.

මෙම දැරියට දින හතරක පමණ කාලයක් උණ රෝගය තිබී ඇති අතර පෞද්ගලික වෛද්‍යවරයෙකුගෙන් රෝගයට ප්‍රතිකාර ලබා ගත් නමුත් සුව නොවීම නිසා යාපනය ශීක්ෂණ රෝහලට රාත්‍රියේදී දැරිය රැගෙන විත් ඇත.

දැරිය රෝහලට ඇතුළත් කර ගැනීමෙන් පසුව වාට්ටුව බාර හෙදිය දැරියගේ අතට කැනීයුලාවක් දැමීමෙන් පසුව ක්‍රමයෙන් ඇගේ අත අකර්මන්‍ය වන්නට පටන් ගෙන තිබෙනවා.

වහාම මේ පිළිබදව වෛද්‍යවරුන්ට තොරතුරු දැනුම් දීමෙන් පසුව දැරියගේ ජීවිතය බේරා ගැනීමට නම් වහාම ඇගේ අත ඉවත් කළ යුතු බවට විශේෂඥ වෛද්‍යවරු තීරණය කොට තිබෙනවා.

ඒ අනුව දැරියව ශල්‍යාගාරයට රැගෙන ගොස් අත ඉවත් කොට දැරියගේ ජීවිතය බේරා ගෙන තිබෙනවා.

උණ රෝගයට ප්‍රතිකාර ලබා ගැනීමට ගොස් මෙසේ අතක් අහිමි වී ඇත්තේ යාපනයේ මල්ලාකම් ප්‍රදේශයේ පදිංචි යාපනය හින්දු විද්‍යාලයේ තුන් වන වසරේ ඉගෙනුම ලබන අට හැවිරිදි දියණියකගේයි.

මේ සම්බන්ධයෙන් අදහස් දක්වමින් උතුරු පළාත් සෞඛ්‍ය සේවා අධ්‍යක්ෂ පී. සත්‍යමූර්ති වෛද්‍යවරයා ප්‍රකාශ කලේ යාපනය ශීක්ෂණ රෝහලේ එවැනි සිද්ධියක් සිදු වී ඇති බවයි.

කැනියුලාවේ යම් දෝෂයක් නිසා මේ තත්ත්වය උද්ගත වූයේද එසේත් නොමැති නම් වෙනත් හේතුවක් ඊට බලපෑවේද යන්න පිළිබදව සොයා බැලීම පිණිස වෛද්‍යවරු දෙදෙනෙකුගෙන් යුත් කමිටුවක් පත් කොට ඇති බවත් එම කමිටු වාර්තාව ලද වහාම සිද්ධිය සම්බන්ධයෙන් ස්ථිර නිගමනයකට පැමිණිය හැකි බවත් උතුරු පළාත් සෞඛ්‍ය සේවා අධ්‍යක්ෂවරයා සඳහන් කර සිටියා.