ණය ට්‍රිලියන ගණන් පෙනුනට රටේ ණය බර දැන් අඩුවෙලා – ලක්මාලි

2026 ජූනි 11, ප.ව. 3:59

---

---

දේශීය ණය ප්‍රමාණය සංඛ්‍යාත්මකව ඉහළ යාම පමණක් සැලකිල්ලට ගෙන රටේ ණය බර වැඩි වී ඇතැයි නිගමනය කළ නොහැකි බව පාර්ලිමේන්තු මන්ත්‍රීනි ලක්මාලි හේමචන්ද්‍ර මහත්මිය ප්‍රකාශ කරයි.

ඇය පෙන්වා දෙන්නේ වත්මන් වන විට ශ්‍රී ලංකාව සතු සමස්ත ණය බර පාලනය කරගත හැකි මට්ටමකට ක්‍රමයෙන් පහත වැටෙමින් පවතින බවයි.

දේශපාලන අධිකාරිය සහ ආර්ථික විශ්ලේෂකයන් සැමවිටම අවධානය යොමු කළ යුත්තේ දළ දේශීය නිෂ්පාදිතයට සාපේක්ෂව පවතින ණය ප්‍රතිශතය කෙරෙහි පමණක් බවත්, මූල්‍ය පීඩනය මැනිය හැකි සැබෑ නිර්ණායකය එය බවත් ඇය සභාගර්භයේදී අවධාරණය කළාය. එ

ම දර්ශකයන්ට අනුව, 2024 වසරේදී සියයට 95.5ක් ලෙස සටහන් වූ මෙරට ණය තිරසාරභාවය 2025 වන විට සියයට 91.6 දක්වා යහපත් අතට හැරී ඇත.

 එමෙන්ම විදේශ මුදලින් පියවීමට ඇති බාහිර ණය ප්‍රමාණය ද සියයට 155.4 සිට සියයට 150.4 දක්වා පැහැදිලි ප්‍රගතියක් පෙන්වමින් අඩු වී තිබේ.

මෙහිදී අතීත පාලනය විවේචනයට ලක් කළ මන්ත්‍රීවරිය, 2015-2019 කාලසීමාවේ පැවති යහපාලන ආණ්ඩුව ජාත්‍යන්තර ස්වෛරී බැඳුම්කර මඟින් ඉහළ පොලී අනුපාත යටතේ වාණිජ ණය ලබාගනිමින් අයවැය පියවීමට කටයුතු කළ බව සඳහන් කළාය.

එහි ප්‍රතිඵලයක් ලෙස එවකට සියයට 73ක්ව තිබූ ණය සහ දළ දේශීය නිෂ්පාදිතය අතර අනුපාතය සියයට 82 දක්වා සීඝ්‍රයෙන් ඉහළ ගිය බව ඇය සිහිපත් කළාය.

එහෙත්, ගතවූ මාස දහඅටක කාලය තුළ වත්මන් පාලනය විසින් ණය වෙනුවෙන් ගෙවිය යුතු පොලී පිරිවැය සාර්ථකව අවම කරගෙන ඇත.

ශ්‍රී ලංකා මහ බැංකු දත්තවලට අනුව, භාණ්ඩාගාරය මැදිහත් වී පොලී අනුපාත නිසි ලෙස පාලනය කිරීම සහ මූල්‍ය සංචිත ක්‍රමවත්ව පවත්වාගෙන යාම මෙම සාධනීය තත්ත්වයට හේතු වී තිබේ.

මේ හේතුවෙන්, 2032 වසර වන විට ළඟා කර ගැනීමට අපේක්ෂා කළ සියයට 95ක ණය ඉලක්කය නියමිත කාලයට බොහෝ පෙරදීම සපුරා ගැනීමට ශ්‍රී ලංකාවට හැකි වී ඇති බව මන්ත්‍රීවරිය වැඩිදුරටත් කියා සිටියාය.

---