රජය ගැන විශ්වාසය බිඳ වැටීමෙන් වෙළඳපොළ අස්ථාවර වෙලා.. කළු කඩේ ඩොලර් මිල ඉහලට.. – හර්ෂ ද සිල්වා

2026 ජූනි 06, පෙ.ව. 12:07

---

---

රටේ වර්තමාන ආර්ථික තත්ත්වය බරපතල අඩියකට වැටෙමින් පවතින බවත්, රජය කෙරෙහි පවතින විශ්වාසය බිඳ වැටීම හේතුවෙන් වෙළඳපොළ අස්ථාවර වී ඇති බවත් පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා පවසයි.

පසුගිය දින කිහිපය තුළ රුපියලේ අගය තවදුරටත් පහත වැටී ඇති බව පෙන්වා දෙන මන්ත්‍රීවරයා, නිල වෙළඳපොළේ ඩොලරයේ අගය රුපියල් 342ක් දක්වා ඉහළ ගොස් ඇති අතර කළු කඩයේ එහි මිල රුපියල් 345 ඉක්මවා ගොස් ඇති බව සඳහන් කළේය.

පොලී අනුපාත ඉහළ දැමීමෙන් පසු දින කිහිපයක් රුපියල ස්ථාවරව පැවතියද, රජය පිළිබඳ විශ්වාසය පළුදු වීම නිසා රුපියල නැවතත් වේගයෙන් අවප්‍රමාණය වීමට පටන් ගෙන ඇති බව ඔහු වැඩිදුරටත් පැවසීය.

රුපියල තවදුරටත් අවප්‍රමාණය වනු ඇතැයි යන බිය සහ අවිශ්වාසය මත විදේශගත ශ්‍රමිකයන් තම ප්‍රේෂණ එවීම පමා කරමින් සිටින බවත්, අපනයනකරුවන් පවා තම ආදායම් මෙරටට ගෙන ඒමට මැළිකමක් දක්වන බවත් මන්ත්‍රීවරයා අනාවරණය කළේය.

මෙම තත්ත්වය හමුවේ ඉදිරි සති කිහිපය තුළ බැංකු පද්ධතියට ආනයන ණයවර ලිපි (LC) සඳහා ගෙවීම් කිරීමට අවශ්‍ය ඩොලර් සපයා ගැනීම දැඩි අභියෝගයක් වනු ඇති බවට ඔහු අනතුරු ඇඟවීය.

ඇමරිකා එක්සත් ජනපදය විසින් මෙරට භාණ්ඩ සඳහා අලුතින් සියයට 2.5ක බද්දක් පැනවීමට සූදානම් වන බවත්, ඒ අනුව මුළු බද්ද සියයට 22.5ක් දක්වා ඉහළ යා හැකි බවත් හර්ෂ ද සිල්වා මහතා මෙහිදී පෙන්වා දුන්නේය.

ලෝකයේ අනෙකුත් රටවල් ඇමරිකාව සමඟ ඇති කරගත් ද්විපාර්ශ්වික ගිවිසුම් හරහා මෙවැනි බදු වලින් නිදහස් වී ඇති නමුත්, ශ්‍රී ලංකා රජය ඇමරිකාව සමඟ සාකච්ඡා කළ බව පැවසුවද ඉන් සාර්ථක ප්‍රතිඵලයක් අත්කර ගැනීමට අපොහොසත් වී ඇති බව මන්ත්‍රීවරයා විවේචනය කළේය.

ඩොලරයේ අගය ඉහළ යාම හමුවේ වෙළඳපොළේ පවතින සියලුම අත්‍යවශ්‍ය භාණ්ඩවල මිල ගණන් ඉහළ යාම වැළැක්විය නොහැකි බවත්, මෙයින් අවසානයේ පීඩාවට පත් වන්නේ පොදු මහජනතාව බවත් මන්ත්‍රීවරයා පැවසීය. රජයේ වගකිවයුත්තන් සහ මුදල් රාජ්‍ය අමාත්‍යවරයා ආර්ථික කළමනාකරණය පිළිබඳව සරල ලෙස අදහස් දැක්වුවද, පවතින සැබෑ තත්ත්වය ඉතා භයානක බවත් ඔහු අවධාරණය කළේය.

---