ලාෆ්ස් ගෑස් මිල ඉහළ යාමත් සමඟ ලිට්‍රෝ මිලට මොකද වෙන්නේ?

2026 නොවැම්‍බර් 15, පෙ.ව. 12:10

ලාෆ්ස් ගෑස් මිල ගණන් ඉතා විශාල මුදලකින් ඉහළ දැමීමට එම සමාගම පියවර ගෙන ඇති අතර මෙම දැවැන්ත මිල සංශෝධනය හේතුවෙන් වෙළෙඳපොළ පාරිභෝගික ඉල්ලුම රජයට අයත් ලිට්‍රෝ ගෑස් වෙත එක්වරම නැඹුරු වීමෙන් ලිට්‍රෝ සමාගමට දැඩි මෙහෙයුම් සහ සැපයුම් පීඩනයක් එල්ල වීමේ අවදානමක් මතුව ඇති බව මාධ්‍ය වාර්තා කරයි.

ලාෆ්ස් සමාගම නිවේදනය කළ නව මිල ගණන්වලට අනුව, කිලෝග්‍රෑම් 12.5 ක බරින් යුත් ගෘහස්ථ ලාෆ්ස් ගෑස් සිලින්ඩරයක මිල රුපියල් 1,775 කින් ඉහළ දමා ඇති අතර, එහි නව සිල්ලර මිල රුපියල් 6,740 ක් දක්වා ඉහළ යනු ඇත.

මීට අමතරව කිලෝග්‍රෑම් 5 ක ගෑස් සිලින්ඩරයක මිල රුපියල් 732 කින් ඉහළ නංවා ඇති අතර එහි නව මිල රුපියල් 2,720 ක් ලෙස සටහන් වේ.

මෙම මිල ඉහළ දැමීමත් සමඟ ලිට්‍රෝ සහ ලාෆ්ස් ගෑස් සිලින්ඩර අතර පවතින මිල පරතරය පෙර නොවූ ලෙස පුළුල් වී තිබේ. දැනට වෙළෙඳපොළේ පවතින ලිට්‍රෝ ගෑස් මිල ගණන්වලට වඩා ලාෆ්ස් ගෑස් මිල ඉතා ඉහළ මට්ටමක පැවතීම හේතුවෙන්, මෙතෙක් ලාෆ්ස් ගෑස් පරිභෝජනය කළ පාරිභෝගිකයින් මෙන්ම ආපනශාලා සහ සුළු පරිමාණ ව්‍යාපාරිකයන් විශාල වශයෙන් ලිට්‍රෝ ගෑස් මිලදී ගැනීමට පෙළඹෙනු ඇති බව මාධ්‍ය වාර්තා කරයි.

එහි ප්‍රතිඵලයක් ලෙස ලිට්‍රෝ ගෑස් සිලින්ඩර සඳහා වන වෙළෙඳපොළ ඉල්ලුම එක්වරම ඉහළ යා හැකි අතර, එම අමතර ඉල්ලුම සපුරාලීම සඳහා වැඩි ගෑස් තොග ආනයනය කිරීමට සහ බෙදාහැරීම් ජාල පුළුල් කිරීමට ලිට්‍රෝ සමාගමට සිදුවනු ඇත. එසේම හිස් සිලින්ඩර හුවමාරු කිරීමේදී පාරිභෝගිකයන් මුහුණ දෙන ගැටලු හේතුවෙන් වෙළෙඳපොළ තුළ යළිත් කෘත්‍රිම හිඟයක් හෝ පෝලිම් නිර්මාණය වීමේ අවදානමක් මතුවිය හැකි බවට ද අනතුරු ඇඟවේ.