අපි හැමදේම දන්නෑ.. විපක්‍ෂයේ දක්‍ෂයන්ටත් තනතුරු දෙනවා..

2026 මැයි 14, පෙ.ව. 12:19

රජයේ තනතුරු සඳහා පුද්ගලයන් පත් කිරීමේදී ඔවුන්ගේ දේශපාලන පක්ෂය නොව, ඔවුන් සතු හැකියාව සහ දක්ෂතාවය පමණක් සලකා බලන නව දේශපාලන සංස්කෘතියක් රට තුළ ස්ථාපිත කරන බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා පවසයි.

ස්වාධීන රූපවාහිනියේ පැවති සාකච්ඡාවකට එක්වෙමින් ඒ මහතා අවධාරණය කළේ, රාජ්‍ය ආයතනවල සියලු තනතුරු පක්ෂයේ හිතවතුන්ගෙන් පුරවා ගැනීමේ පැරණි වැරදි සංස්කෘතිය තම රජය ප්‍රතික්ෂේප කරන බවයි.

කලින් පැවති රජයන් යටතේ රාජ්‍ය ආයතන තනතුරු බෙදා දීම පක්ෂ දේශපාලනය මත පදනම් වූ බවත්, වත්මන් රජය එම ක්‍රමය වෙනස් කර ඇති බවත් ලේකම්වරයා පැවසීය.

“අපි බලයට ආවේ රාජ්‍ය ආයතනවල තනතුරු ඔක්කොටම අපේ පක්ෂයේ කට්ටිය දාගන්න නෙවෙයි. අපිට ඕන කරන්නේ ඒ තැන්වලට හැකියාව තියෙන අය දාගන්න. එතකොට අපි එයාගේ දේශපාලන පක්ෂය මොකක්ද කියලා හොයන්න යන්නේ නැහැ,” යනුවෙන් ඔහු වැඩිදුරටත් සඳහන් කළේය.

වත්මන් රජය යටතේ ක්‍රිකට් කමිටුව වැනි ආයතන සඳහා දක්ෂයන් පත් කර ඇති ආකාරය ඔහු නිදසුන් ලෙස පෙන්වා දුන්නේය.

රජයක් ලෙස සියලු දේ තමන් පමණක් දන්නා බව සිතීම මුලාවක් බව පෙන්වා දුන් ටිල්වින් සිල්වා මහතා, ඕනෑම ක්ෂේත්‍රයක සිටින දක්ෂතම පුද්ගලයාගේ සහාය ලබා ගැනීම රජයේ ප්‍රතිපත්තිය බව කියා සිටියේය.

දැනටමත් ඇතැම් ආර්ථික විශේෂඥයන් සහ උපදේශකයන් කිසිදු වේතනයක් පවා ලබා නොගෙන, රට කෙරෙහි ඇති හැඟීමෙන් පමණක් රජයට සහාය දෙන බවත්, ඔවුන් පක්ෂ සාමාජිකයන් නොවන බවත් ඔහු හෙළි කළේය.

ආණ්ඩු කිරීම යනු සියල්ල තමන් සතු කර ගැනීම නොව, මානව සහ ස්වභාවික සම්පත් නිවැරදිව කළමනාකරණය කිරීම බව ටිල්වින් සිල්වා මහතා මෙහිදී ප්‍රකාශ කළේය.

“අපි වැඩ කරන්න ඕන පක්ෂයක් එක්ක නෙවෙයි, රටක් එක්ක,” යැයි පවසමින් ඔහු අවධාරණය කළේ රාජ්‍ය සේවයේ සිටින දක්ෂ නිලධාරීන් ඉවත් කර තම පක්ෂයේ පිරිස් පත් කිරීමට රජය කිසිසේත් කටයුතු නොකරන බවයි.

මෙම නව ප්‍රවේශය හරහා රටේ මානව සම්පත නිවැරදිව කළමනාකරණය කරමින් රට ගොඩනැඟිය හැකි බව ලේකම්වරයා විශ්වාසය පළ කළේය