ඩොලර් මිලියන 2.5 සයිබර් ක‍්‍රයිම් එකක්.. පලවෙනි වතාව නෙමෙයි.. ලෝකෙ පුරාම වෙනවා.. මෙහෙ විතරක් වුන මැජික් එකක් නෙමෙයි.. – වසන්ත සමරසිංහ

2026 අගෝස්‍තු 07, පෙ.ව. 12:15

---

---

භාණ්ඩාගාරයේ ඩොලර් මිලියන 2.5ක මුදලක් අස්ථානගත වීම ශ්‍රී ලංකාවට පමණක් සීමා වූ සුවිශේෂී සිදුවීමක් හෝ ඉතිහාසයේ ප්‍රථම වතාවට සිදු වූ මැජික් එකක් නොවන බව අමාත්‍ය වසන්ත සමරසිංහ මහතා පාර්ලිමේන්තුවේදී ප්‍රකාශ කළේය.

මෙම සිදුවීම සම්බන්ධයෙන් අදහස් දක්වමින් අමාත්‍යවරයා කියා සිටියේ, සයිබර් අපරාධ හරහා සිදුවන මෙවැනි මූල්‍ය අස්ථානගත වීම් ලෝකයේ ඕනෑම රටකට සිදුවිය හැකි බවයි.

මේ පිළිබඳව ශ්‍රී ලංකා පරිගණක හදිසි ප්‍රතිචාර සංසදය සහ විෂය පිළිබඳ විශේෂඥයන් දැනුවත් වී ඇති අතර, ඔවුන් ඒ සම්බන්ධයෙන් අවශ්‍ය විමර්ශන සිදු කරමින් පවතින බව ද ඔහු සඳහන් කළේය.

ආසියානු සංවර්ධන බැංකුව සහ ඉන්ටර්පෝල් ආයතනය මගින් නිකුත් කර ඇති වාර්තා උපුටා දක්වමින් අමාත්‍යවරයා පෙන්වා දුන්නේ, සයිබර් අපරාධ හේතුවෙන් ආසියානු කලාපයේ සහ ලෝකයේ ආර්ථිකයන්ට එල්ල වන බලපෑම පිළිබඳව එම ආයතන නිරන්තරයෙන් කරුණු වාර්තා කරන බවයි.

හැකර්වරුන් විවිධ සංකීර්ණ ක්‍රමවේද ඔස්සේ මෙවැනි අපරාධ සිදු කරන බවත්, මෙය දිනෙන් දින වර්ධනය වන ගෝලීය තර්ජනයක් බවත් ඔහු වැඩිදුරටත් පැවසීය.

මෙම සිදුවීම ශ්‍රී ලංකා ඉතිහාසයේ ප්‍රථම වතාවට සිදු වූ අද්භූත සිදුවීමක් ලෙස හුවා දැක්වීමට ඇතැම් පාර්ශව උත්සාහ කරන බව විවේචනය කළ අමාත්‍යවරයා, මෙය හුදෙක් මුදල් නෝට්ටු අස්ථානගත වීමක් පමණක් නොව, සමස්ත ආර්ථිකයටම බලපාන සංකීර්ණ සයිබර් අපරාධ ක්‍රියාවලියක කොටසක් බව ද අවධාරණය කළේය. 

---