දිවයින පුරා ඉන්ෆ්ලුවෙන්සා ආසාදිතයින්ගේ ඉහළ යාමක් – වෛද්‍ය පර්යේෂණ ආයතනයෙන් රතු එළියක්

2026 සැප්‍තැම්‍බර් 26, පෙ.ව. 12:14

---

---

ශ්‍රී ලංකාවේ ඉන්ෆ්ලුවෙන්සා A H1N1 ආසාදනවල මෑතකාලීන වැඩිවීමක් දක්නට ලැබෙන බව වෛද්‍ය පර්යේෂණ ආයතනයේ (MRI) ජාතික ඉන්ෆ්ලුවෙන්සා මධ්‍යස්ථානය පවසයි.

උපදේශක වෛරස් විද්‍යාඥ වෛද්‍ය ක්‍රිෂාන් ජූඩ් ජයමහ මහතා සඳහන් කළේ ජාතික ඉන්ෆ්ලුවෙන්සා මධ්‍යස්ථානයේ රසායනාගාර නිරීක්ෂණවලදී H1N1 ආසාදිත ධනාත්මක සාම්පල සංඛ්‍යාවේ වැඩිවීමක් හඳුනාගෙන ඇති බවයි.

උණ, ශරීර කැක්කුම හෝ ඉන්ෆ්ලුවෙන්සා ආශ්‍රිත වෙනත් රෝග ලක්ෂණ ඇති වූ විට ස්වයංව ඖෂධ ලබා ගැනීමෙන් වැළකී වෛද්‍ය උපදෙස් ලබා ගන්නා ලෙස ඔහු ජනතාවගෙන් ඉල්ලා සිටී.

විශේෂයෙන් දින දෙකකට වැඩි කාලයක් උණ පවතින්නේ නම් වෛද්‍යවරයෙකුගේ උපදෙස් ලබා ගැනීම වැදගත් බව වෛද්‍ය ජයමහ මහතා පෙන්වා දුන්නේය. එමෙන්ම, ඉන්ෆ්ලුවෙන්සා රෝග ලක්ෂණ ඇති පුද්ගලයින් වේදනා නාශක ඇතුළු ඖෂධ භාවිත කිරීමේදී වෛද්‍ය උපදෙස් ලබා ගැනීමේ වැදගත්කමද ඔහු අවධාරණය කළේය.

ගැබිනි කාන්තාවන්, වැඩිහිටියන් සහ වයස අවුරුදු දෙකට අඩු දරුවන් ඉන්ෆ්ලුවෙන්සා සම්බන්ධ සංකූලතාවලට වැඩි අවදානමක් සහිත කණ්ඩායම් ලෙස සැලකෙන බැවින්, එවැනි පුද්ගලයින්ට රෝග ලක්ෂණ මතු වුවහොත් කඩිනමින් වෛද්‍ය උපදෙස් ලබා ගන්නා ලෙසද උපදෙස් ලබා දී තිබේ.

ඉන්ෆ්ලුවෙන්සා රෝග ලක්ෂණ ඩෙංගු රෝගයේ රෝග ලක්ෂණ සමඟ සමාන විය හැකි බැවින් ඒ පිළිබඳවද අවධානයෙන් සිටින ලෙස වෛද්‍ය ජයමහ මහතා ජනතාවට දැනුම් දෙයි.

සාමාන්‍යයෙන් ඉන්ෆ්ලුවෙන්සා ආසාදනය සමඟ උණ, කැස්ස, උගුරේ අමාරුව, නාසයෙන් දියර ගැලීම, හිසරදය, ශරීර කැක්කුම සහ අධික තෙහෙට්ටුව වැනි රෝග ලක්ෂණ ඇති විය හැකිය.

රෝග ලක්ෂණ නොනැවතී පැවතීම හෝ තත්ත්වය නරක අතට හැරීම, විශේෂයෙන් හුස්ම ගැනීමේ අපහසුතාව, දරුණු දුර්වලතාව හෝ පපුවේ වේදනාව වැනි ලක්ෂණ ඇති වුවහොත් කඩිනමින් වෛද්‍ය ප්‍රතිකාර ලබා ගන්නා ලෙසද ජනතාවට උපදෙස් දී තිබේ.

---