ණය ගෙවන්න පටන් ගත්තාම නැවත අර්බුදයක් ඇති වෙන කතාව බොරුවක්

2024 දෙසැම්‍බර් 02, පෙ.ව. 12:04

ශ්‍රී ලංකාව නැවත විදෙස් ණය ගෙවීම ආරම්භ කළ විට රට යළි අර්බුදයකට යන බවට වැරදි මතයක් පැතිරෙන බව ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ පවසයි.

“දළ දේශීය නිෂ්පාදිතයේ ප්‍රතිශතයක් විදියට හැම වසරකම විදේශ ණය වශයෙන් foreign currency debt විදියට ගෙවන්න තියෙන්නේ උපරිම දළ දේශීය නිෂ්පාදිතයෙන් 4.5% යි. කලින් තිබුණේ 9.2% ක්. මුල දී අවුරුදු ගණනාවක්ම තියෙන්නේ පොලිය විතරයි ගෙවන්න.

ඊට වඩා ගොඩාක් අඩු ප්‍රමාණයක් තමයි ඊළඟ 2027 වෙනකං ගෙවන්න තියෙන්නේ. 2028 ඉඳන් ක්‍රමානුකූලව ඊළඟ අවුරුදු ගාණක් තුළ අර නිර්ණායකයට යටත්ව ගෙවන්න තියෙනවා. එය අපි දකින්නේ සෑහෙන සහනයක් විදිහට. යම්කිසි හොඳ කාලයක් ලැබිලා තියෙනවා අපේ සංචිත ගොඩනඟා ගැනීමට සහ අවශ්‍ය ප්‍රතිපත්ති සකස් කිරීමට. ආර්ථිකය නැවත ස්ථාවරව ඉදිරියට යාමට අවශ්‍ය කාලය මේ ණය ප්‍රතිව්‍යූහගතකරණයෙන් ලැබිලා තියෙනවා.

මම දැක්කා සමහරු ප්‍රකාශ කරලා තියෙනවා, නැවත ණය ගෙවීමට පටන් ගැනීම තුළ නැවතත් අපි මේ අර්බුදයට යනවා කියලා. ඒක සම්පූර්ණයෙන්ම වැරදි මතයක්. එහෙම වෙනවා නම් ණය ප්‍රතිව්‍යූහගතකරණයක් අවශ්‍ය වෙන්නේ නැහැනේ. ප්‍රතිව්‍යූහගතකරණය නොකර ණය ගෙවන්න පටන් ගත්තා නම් අපි අනිවාර්යයෙන්ම අර්බුදයකට යනවා.

මොකද අපේ සංචිත ඒ තරම් නැහැ. රටට ගෙවන්න ධාරිතාවක් නැහැ. රජයට ඒතරම් ණය ගෙවන්න ධාරිතාවක් නැහැ. ඒක නිසා තමයි ණය ප්‍රතිව්‍යූහගතකරණය කරලා, මේ රාජ්‍ය මූල්‍ය ප්‍රතිපත්තිය ක්‍රියාත්මක කරලා, ගෙවීමේ හැකියාව වැඩිකරන ගමන් ගෙවීමට පුළුවන් හැකියාව ශක්තිමත් කරලා, පහසුවෙන් ගෙවන්න පුළුවන් ක්‍රමවේදයක් හදන්නේ.

ඒ නිසා ණය නැවත ගෙවීම පටන් ගැනීම තුළින් අර්බුදයකට යනවා කියන කතාව වැරදියි. මේ ක්‍රියාදාමය මෙහෙම ගියොත් එහෙම ප්‍රශ්නයකට එන්නේ නැහැ.”