මැගසින් ගැටුමින් බන්ධනාගාරයට දැඩි හානි

2026 අගෝස්‍තු 07, පෙ.ව. 10:05

---

---

බොරැල්ල මැගසින් බන්ධනාගාරයේ ‘ඊ’ වාට්ටුවේ රඳවා සිටින රැඳවියන් පිරිසක් ඊයේ (06) රාත්‍රියේ කලහකාරී ලෙස හැසිරීම හේතුවෙන් බන්ධනාගාර පරිශ්‍රය තුළ දැඩි නොසන්සුන්කාරී වාතාවරණයක් හටගත්තේය.

වාර්තා වන අන්දමට, අදාළ වාට්ටුවෙන් හදිසියේම පිටතට පැමිණි රැඳවියන් පිරිසක් බන්ධනාගාර දේපළවලට හානි කරමින් නොසන්සුන් ලෙස හැසිරී ඇත.

තත්ත්වය පාලනය කිරීම සඳහා බන්ධනාගාර නිලධාරීන්ට අමතරව පොලිසිය, පොලිස් විශේෂ කාර්ය බලකාය සහ කැරලි මර්දන ඒකකය ද වහාම එම ස්ථානයට කැඳවීමට බන්ධනාගාර බලධාරීන් පියවර ගෙන තිබිණි.

බන්ධනාගාරය තුළ පවතින තත්ත්වය සහ රැඳවියන්ගේ හැසිරීම් නිරීක්ෂණය කිරීම සඳහා ශ්‍රී ලංකා ගුවන් හමුදාවට අයත් ඩ්‍රෝන යානා ද යොදාගත් බව වාර්තා වේ.

ආරක්ෂක අංශවල දැඩි මැදිහත්වීම මත මධ්‍යම රාත්‍රිය වන විට තත්ත්වය සම්පූර්ණයෙන්ම පාලනය කර බන්ධනාගාරයේ ආරක්ෂාව තහවුරු කිරීමට හැකි වූ බව පොලිසිය තහවුරු කළේය.

මෙම කලහකාරී සිදුවීම හේතුවෙන් බන්ධනාගාර දේපළවලට යම් හානි සිදුව ඇති අතර, සිද්ධිය සම්බන්ධයෙන් බන්ධනාගාර බලධාරීන් සහ පොලිසිය වැඩිදුර විමර්ශන ආරම්භ කර ඇත.

---